DR Congo: Habaruwe abasivili 47 biciwe mu rusengero na ADF
Abantu 47 nibo bishwe kuri iki cyumweru tariki ya 27 Nyakanga, mu Ntara ya Ituri muri Repubulika Iharanira Demokarasi ya Congo (RDC), mu gitero cyagabwe n’umutwe witwaje intwaro wa Allied Democratic Forces (ADF-NALU), ufitanye isano n’abo mu mutwe wa Islamic State.
Ubu bwicanyi bwabereye mu rusengero Gatolika rwo muri Komanda, mu karere ka Irumu, Intara ya Ituri.
Ingabo za Leta ya Congo (FARDC) zemeje ayo makuru, zivuga ko abantu “barenga 40” bishwe, benshi biciwe mu buryo bubabaje hakoreshejwe imihoro.
Umuryango w’Ubumwe wa Congo (Alliance Fleuve Congo – AFC/M23), binyuze ku rubuga rwa X, wamaganye aya mahano, uvuga ko wamaganye bikomeye iyicwa ry’abanyagihugu.
Wagaragaje ko Leta ya RDC yananiwe kurinda abaturage, bityo bikaba impamvu ituma M23 “yiyemeza kugarura ubutegetsi muri teritwari yose.”
“Itoneshwa ry’uburangare bwa Leta ya Kinshasa mu kurinda abaturage b’inzirakarengane rituma AFC/M23 ifata inshingano zo kugarura ubutegetsi muri teritwari yose ya RDC,” ni amagambo yanditswe mu itangazo ryashyizwe hanze n’umuvugizi wa M23, Lawrence Kanyuka, kuri X.
ADF ni umutwe w’iterabwoba w’abarwanyi b’Abayisilamu bakomoka muri Uganda, ukorera mu burasirazuba bwa RDC. Leta ya Uganda n’Amerika bawushyira mu byiciro by’imitwe y’iterabwoba. Guhera mu mpera z’imyaka ya 1990, ADF ikorera mu Ntara ya Kivu y’Amajyaruguru hafi y’umupaka na Uganda, aho ikunze kugaba ibitero ku baturage ba Uganda n’aba Congo.
Mu bitero bya vuba aha, hagati muri Mata uyu mwaka, hagati y’abaturage 10 na 15 bishwe mu gace ka Beni, mu gihe mu Ukwakira umwaka ushize, nibura abantu 20 bishwe muri ako gace, byose bigahuzwa n’ADF.
