Urwego rw’u Burundi rushinzwe iperereza (SNR) rwataye muri yombi Brig Gen Bertin Gahungu wavuzweho uruhare rukomeye mu bugizi bwa nabi bwakorewe muri iki gihugu.
Brig Gen Gahungu yafatiwe ku cyicaro gikuru cya Polisi i Bujumbura ku wa 21 Kanama 2025, yoherezwa muri kasho ya SNR. Abarinzi be na bo bafashwe, gusa impamvu bose bafashwe ntiramenyekana.
Uyu mupolisi yakoze imirimo itandukanye mu nzego z’umutekano n’iperereza. Kuva mu 2021 yakoreraga muri Ambasade y’u Burundi mu Muryango w’Abibumbye i New York, acyurwa muri Gicurasi 2025.
Muri Mata 2007, Brig Gen Gahungu yavuzwe mu bagize uruhare mu gufunga Hussein Radjabu wahoze ari Umuyobozi Mukuru w’ishyaka CNDD-FDD riri ku butegetsi, washinjwaga umugambi wo gushaka guhungabanya umutekano w’u Burundi.
Icyo gihe, Brig Gen Gahungu yafungishije umuturage witwa Evariste Kagabo, ategeka ko akorerwa iyicarubozo kugira ngo ashinje Radjabu ko yatutse Nkurunziza ko ari nk’icupa ririmo ubusa.
Mu gihe mu Burundi habaga imyigaragambyo yo kwamagana manda ya gatatu ya Nkurunziza mu 2015, Brig Gen Gahungu yavuzweho uruhare rukomeye mu kwica, kwica urubozo no kuzimiza abantu. Icyo gihe yayoboraga iperereza imbere mu gihugu.
Muri uwo mwaka kandi, Brig Gen Gahungu yahagarikiye abahondaguye umunyamakuru ukorera RFI, Esdras Ndikumana, ku cyicaro gikuru cy’urwego rw’iperereza mu Burundi.
